प्रचण्डले हेरे श्वेताको ‘कान्छी’ (भिडियो सहित)
श्वेता खड्काले निर्माण गरेको फिल्म ‘कान्छी’ लाई पुर्व प्रधानमन्त्री पुष्पकमल दाहाल प्रचण्डले हेरेका छन् । आइतबार राती कमलपोखरीस्थित कुमारी हलमा कान्छी हेर्न प्रचण्ड परिवार सहित उपस्थित भएका थिए । भिडियो हेर्नुस् :
पुरा फिल्म हेर्दै प्रचण्डले ‘कान्छी’ फिल्म र कलाकारको कामको प्रशंसा गरे । फिल्म सुरु हुनुभन्दा पहिले बोल्ने क्रममा श्वेता र आफ्नो परिवारको पिडा एउटै भएकाले पनि कान्छी हेर्न आएको पुर्व प्रधानमन्त्री दाहालले बताए । ‘हाम्रो पिडा एउटै हो । हामी एक अर्काका साथी हौं । देश र जनताको लागि श्वेताजीलाई शोकलाई शक्तिमा बदल्न आग्रह गर्दछु’, प्रचण्डले भने ।
‘कान्छी’को शोमा सामान्य प्रशासन मन्त्री लालबाबु पण्डित, माओवादी केन्द्रका नेता नारायणकाजी श्रेष्ठ, सञ्चार राज्यमन्त्री गोकुल बाँस्कोटा, नयाँ शक्तिकी वरिष्ठ नेतृ हिसिला यामीले आकाश अधिकारी निर्देशित कान्छी हेरे । उनीहरुले फिल्म राम्रो लागेको प्रतिक्रिया दिए ।
यस्तै ‘कान्छी’को ‘पोलिटिकल शो’मा पुराना पोस्टर डिजाइनर सुन्दर श्रेष्ठलाई पुर्व प्रधानमन्त्रीको हातबाट सम्मान गरियो । फिल्मको शो सकिएपछि माझी बस्ती निर्माणका लागि इजी रेमिटेन्सले पचास हजार र प्रकाशबाबु थापाले एक लाख दश हजार श्वेतालाई हस्तान्तरण गरे । बैशाखसम्म माझी बस्ती बनाएर हस्तान्तरण गर्ने श्वेताले बताइन् ।
