सन्तपुरमा कम्मर मर्काउँदै ‘रामकहानी’का सबै कलाकार
बाढी प्रभावितका लागि धुर्मुस सुन्तलीले निर्माण गरेको एकिकृत नमुना सन्तपुर बस्ती, रौतहटमा फिल्म ‘रामकहानी’ को गीत छायाँकन गरिएको छ । फिल्मका सबै कलाकार समावेश हुने गीतको छायाँकन विगत ५ दिनदेखि उक्त बस्तीमा भैरहेको छ ।
‘बस्तीलाई अझ धेरैले हेरुन् भनेर गीतको छायाँकन गर्न लागिएको हो’, बिहिबार बस्ती पुगेकी कुञ्जना घिमिरे सुन्तली ले भनिन्, ‘फेरी नेपाली फिल्मलाई हामीले सर्पोट नगरे कसले गर्ने ?’ यसअघिमा फिल्ममा हिमाल र पहाडका सुन्दर दृश्य खिच्दै आएका निर्देशक सुदर्शन थापा यस पटक दर्शकका लागि फरक स्वाद दिन सन्तपुर झरेको बताउँछन् । ‘दर्शकलाई केही फरक होस् भनेर बस्ती आएका हौं’, निर्देशक थापा भन्छन्, ‘बस्ती बनेदेखि नै यहाँ एउटा गीत खिच्ने रहर थियो । यहाँ आएर खिच्दा साँच्चै रमाइलो लागि रहेको छ ।’
कविराज गहतराजले कोरियोग्राफी गरिरहेको गीतमा नायिका पूजा शर्मा, नायक आकाश श्रेष्ठ, कलाकारहरु जितु नेपाल, केदार घिमिरे, माग्ने बुढा, विल्सन विक्रम राईले एकसाथ कम्मर मर्काएका छन् । कोरियोग्राफर गहतराज आफ्नो करिअरको उत्कृष्ट कोरियोग्राफीमा रामकहानी को यो गीत पनि पर्न आउने बताउँछन् ।
अर्जुन पोखरेल शब्द तथा संगीत रहेको ‘तिम्रो लागि म छु दुनियाँ छोडिदेऊ’ बोलको गीतमा सुगम पोखरेल र अञ्जु पन्तको स्वर छ । भदौ २२ गतेलाई प्रदर्शन मिति तोकिएको ‘रामकहानी’को एउटा गीत र केही दृश्यहरु खिच्न बाँकी छ ।